جبناهه گري / نجم خطاوي
جبناهه گري
من زمن قيل وقال
لا عيش الهنه
لا گحف راحة بال
....
جبناها سگم
من دخلتك تيمور
لا قانون يحكم
والبطش دستور
حكام وطغاة
وقمع وأبشع جور
ارذال ومالهم
منه تحمل جمال
......
جبناها انچفص
يوم الحكم صدام
أنفال ومقابر
عسكره وعدام
ويولون گلنه
شرذمه وظلام
بس حال الگبل
بقوه نفس الحال
......
جبناها محن
كل يوم يشبه يوم
لا حال التبدل
لا فرح مظلوم
ضيم ومسخره
وهموم فوگ هموم
چثيره أقوالهم
بس قلة الأفعال
....
جبناها عكس
ونعجن زين بشين
نرجع ليوره
ما مره متقدمين
مليوصه صفت
وختلط ماي وطين
حسرات البقت
وهموم بالدلال
.....
هاي المهزله
ليوين تبقه هاي
يكتلنه العطش
دايرنه كل هالماي
خبرناهم قشامر
والوعود هواي
حاكمهم دجل
اعوج وفاتح فال
...
عشناهه بأمل
ننطر بلدنه يعود
نحلم بالعدالة
وبالعراقي يسود
خلصوهه علينه
وعود بعد وعود
ملينه وجزعنه
الصبر كلش طال
.....
يمحمل ذهب
تاكل عشب عاگول
والواوي سرح
لاغفها عرض وطول
لا هو ينفهم
لا هو وضع معقول
والناس فقرت
وتنعمت الأنذال
.....
طالت محنتك
يا وطن وانذليت
ساوونه بظلمهم
بيت يشبه بيت
يا ريتك تفز
تصرخ كفى يا ريت
وتحشم الخوه
عمام ويه خوال
....
نخرب حسابهم
ونعدل الميزان
ونسير وأملنه
چبير بالشبان
رفعتم راسنه
عليتم البنيان
من يوم المشيتو
سباع نعم أبطال
....
لو شحت الدنيه
نصير احنه السيل
نضويلك شمس
ونزيح هذا الليل
تدرينه نشامه
الحيل ذاك الحيل
نعلي رايتك
تتجدد الآمال
........
السبت/١٢ أيلول ٢٠٢٠