بحبك نظل أكبار / سامي سلطان
سلامات يا وطني
كلما تشب تنطفي
نار الحقد والغل
تبقى علم يا وطن
وطيبك ابطيب الفل
سلامات يا وطني
شعبك يضل جبار
يحتار بيك العدو
اشما جرى اشما صار
ايام سوده انگضت
وشبانه استشهدت
بحبك نظل اكبار
هذا شعبنا انتفض
والشعب يطلب ثار
تاريخه نور انكتب
كل حرف منه اشعار
صولات بيها الشعب
هز بيها عرش العار
العشرين الك شاهده*
وتموز ابو الثوار*
ليل الظلم ينتهي
وانت تظل يا وطن
وشعبك يظل مغوار
سلامات يا وطني
ما دام دمك حار
يخسون گالوا متت
ذولاك كلهم عار
صامد تظل وصلب
ما تنثني بالنار
حلمك صدگ ينحسد
لا مو ضعف مو تعب
حلمك حلم ثوار
طال الزمن لو گصر
لوغدر بيك جار
بحبك تره نفتخر
ونبقى نعيش احرار
بحبك تره نفتخر
نبقى نعيش احرار
سامي سلطان
٢٠١٨/٧/١٦
* ثورة العشرين هي تلك الثورة التي اندلعت ضد الاحتلال البريطاني عام 1920
* ثورة 14 المجيدة التي ابدلعت عام 1958 والتي وجهت صفعة قوية لقوى الاستعمار واذنابه